Gogoeta eta ondorioak

Atal honetan lan honek guregan izan duen eragina eta sortu dizkigun gogoetak plazaratu nahi izan ditugu.  Guri baliagarria izan zaigun bezala denontzako aberasgarria izan daitekeen karpeta eder bat sortu dugu blog honetan eta gozatzea soilik ez zaigu geratzen. Hau esanda, hemen doa gure gogoeta pertsonala.

Errepertorio literario honen osaketan gure oroitzapenak pisu handia izan dute, izan ere, bibliografiaren pisu handia guk haurtzaroan izandako bizipenek hartu dute. Esan daiteke haurtzarora bidai txiki bat egin behar izan dugula gaur egungora ekartzeko eta bidai hori oso positiboa izan da. Gauza mordoaz oroitu eta ohartu gara, esaterako, oroitzapen politak, gurasoak kantatzen zizkiguten abestiez edota irakasleek erabiltzen zituzten esapideez, baina batez ere iraunkortasun hori ikusi dugu, hau da, oraindik ere ipuin zein kanta horiez gogoratzen garela eta bihotzean sentimendu asko pizten zaizkigula. Ikusi dugu, gainera, gaur egun dugun izaeran literatura honek garrantzia eta eragina izan duela. 

Irakasle garen heinean eta HHko etapaz gain LHko etapan esperientzia izan dugunez, sarri ipuin kontaketak, abestiak kantatzeak eta beste hainbat literatura aspektuk LHn ez dutela lekurik. Etapa horretara iristean liburuak eta zereginak nagusitzen dira gehienbat eta literaturak garrantzia galtzen du. Ipuinak haur txikientzako direla iruditzen zaigu eta abestiak kantatzea denbora galtze bat. Baina ohartu gara honek ez lukela honela izan behar, literatura bizitza guztirako gozamena da eta ikaskuntza eskaintzen digu, giza garapenean uste baino leku gehiago du eta haurrentzat oso egokiak dira.

Honekin batera ohartu gara zein garrantzitsua den ipuina kontatzerako orduan ondo egitea. Sarri iruditzen zaigu umeen aurrean gauzak edonola egin daitezkela baina orudan eta garrantzitsuagoa da haurren aurrean egiten duguna ondo zaintzea, horregatik, ipuinak ere ondo kontatu behar ditugu. Hots, momentu egokia bilatu behar dugu, espazioak ere atsegina izan behar du eta kontalariak ere paper hori sakonki hartu behar du mezua ondo transmititu ahal izateko.

Azkenik, hizkuntzaren ikuspegia hartuz, ahozko literatura hizkuntzaren ikuspegi desberdin bat dela ikusi dugu. Erabili dugun errepertorio literarioak hizkuntza formalarengandik aldentzen dela uste dugu haurren ikuspuntuari dagokionez, hau da, ez da zeregin formala eta derrigortua, baizik eta gozamenerako eta plazerrerako eskaintzen den hizkuntza ikasteko eta transmititzeko aukera. 

Laburbilduz, gehienbat gure oroitzapenekin osatu dugun errepertorio honekin gauza asko ikasi ditugu eta ahozko literaturak duen garrantziaz ohartu gara, hizkuntzaren transmisioan duen paperaz gehienbat. Beraz, haurrekin erabiltzeko bilduma polit hau guretzat zein beste edonorentzat baliagarrian izan dadin espero dugu eta bizitzako hainbat aspektutan erabiltzen saiatuko gara, hau da, LHko etapara ekartzen.